नाशकातील सिन्नरचे तालुका कृषी अधिकारी अण्णासाहेब गागरे यांना लाच लुचपत प्रतिबंधक विभागाने ५० हजार रुपयांची लाच स्वीकारताना रंगेहात अटक केली. ही घटना शुक्रवारी (दि.२१) घडली.
महिनाभरात सहकार विभागातील दोन अधिकारी आणि त्यानंतर आता तालुका कृषी अधिकारी लाच लुचपत प्रतिबंधक विभागाच्या जाळ्यात अडकले.
अण्णासाहेब हेमंत गागरे (42, रा. प्राइड ग्लोरी अपार्टेंट, नाशिक रोड, नाशिक) असे संशयित आरोपी तालुका कृषी अधिकाऱ्याचे नाव असून त्यांच्याकडे निफाडचाही अतिरिक्त पदभार आहे.
तक्रारदार हे सिन्नर एमआयडीसी या ठिकाणी शेती यंत्रे व अवजारांचे उत्पादन करतात. त्यांनी उत्पादित केलेल्या यंत्रे व अवजारांच्या खरेदीवर शेतकऱ्यांना कृषी विभागाकडून अनुदान वितरित केले जाते. परंतु गागरे यांनी तक्रारदाराकडून उत्पादित केलेली यंत्रे ही अनुदानास पात्र नसल्याचे भासवून तक्रारदार यांना त्यांनी उत्पादित केलेल्या यंत्रावर कृषी विभागाकडून अनुदान मिळवून देण्याकरिता ४ लाख रुपये लाचेची मागणी करून तडजोडी अंती २ लाख रुपये लाच घेण्याचे निश्चित केले. त्यातील लाचेचा पहिला हफ्ता ५० हजार रुपये पंचासमक्ष स्वीकारताना रंगेहात पकडण्यात आले.गुन्हा दाखल करण्याची प्रक्रिया रात्री उशिरापर्यंत सुरू होती.