राज्यात पोलीस भरतीत मोठा घोटाळा उघडकीस आला आहे. भूकंपग्रस्तांचं बोगस प्रमाणपत्र बनवून पोलिसाची नोकरी मिळवण्याचे प्रकार घडले. अशाच एका रॅकेटचा पुण्यात भांडाफोड झाला आहे. शिवाजीनगर मुख्यालयात कार्यरत असलेला पोलिस शिपाई गोविंद इंगळेचं प्रमाणपत्र बनावट असल्याचं समोर आलं. याप्रकरणी त्याच्यावर गुन्हा दाखल करण्यात आला आहे.
बनावट भूकंपग्रस्त प्रमाणपत्राचं एक रॅकेट परभणीत नुकतंच उघडकीस आलं. त्याच्या चौकशीत पुण्यातील काही पोलिस कर्मचाऱ्यांच्या कागदपत्रांची पडताळणी केली गेली. तेव्हा हा सर्व प्रकार समोर आलाय. अशाच प्रकारे आणखीही कोणी पोलिसाची नोकरी मिळवलीय का याची चौकशी करण्यात येतेय.
काय आहे मोडस ऑपरेंडी
लातूर, परभणी, नांदेड या भागात मोठ्या प्रमाणावर भूकंपग्रस्त प्रकल्पग्रस्तांचे प्रमाणपत्र देणाऱ्या टोळ्या सक्रीय आहेत. भूकंपग्रस्त किंवा प्रकल्पग्रस्ताचं एक बोगस प्रमाणपत्र एक लाख 40 हजार ते अडीच लाखापर्यंत मिळतं. प्रकल्पग्रस्त किंवा भूकंपग्रस्ताला पकडून कोर्टात खोटा दावा दाखल केला जातो. कोर्टाबाहेर तडजोड करुन प्रमाणपत्र मिळवलं जातं. सरकारी नोकरी मिळवण्यासाठी हेच बोगस प्रमाणपत्र वापरलं जातं.