चंद्रपूर जिल्ह्यातील तळोळी बाळापूर वनपरिक्षेत्रांतर्गतमधील गोविंदपूर वनक्षेत्रातील येनोली माल बिट कक्ष क्रमांक ६५ मध्ये मादी बिबट मृतावस्थेत आढळून आल्याने एकच खळबळ उडाली आहे. वाघासोबतच्या झुंजीत मादी बिबट्याचा मृत्यू झाल्याचा प्राथमिक अंदाज वनाधिकाऱ्यांचा आहे.
माहितीनुसार,तळोधी बाळापूर वनपरिक्षेत्रातील येनुली मालचे वनरक्षक श्रीरामे गुरुवारी सकाळी गस्तीवर असताना कक्ष क्रमांक ६५ मध्ये अंदाजे दीड ते दोन वर्षे वयाची मादी बिबट मृतावस्थेत आढळली. वाघासोबतच्या झुंजीत तिचा मृत्यू झाल्याचा अंदाज वर्तवला आहे. मौका पंचनामा केल्यानंतर पशुधन विकास अधिकारी ममता वानखेडे, पशुधन विकास अधिकारी एस.बी. बनाईत यांनी शवविच्छेदन केले. मृत बिबट्याचे नमुने प्रयोगशाळेत पाठवण्यात येणार असून अहवालानंतरच मृत्यूचे नेमके कारण स्पष्ट होणार आहे.