विश्वभारत News Website
Related Articles
– स्थानिक गुन्हे शाखेची कारवाई
चंद्रपूर,
शहरातील रामनगर पोलिस ठाणे हद्दीत दारूतस्करांविरुद्ध एकाच रात्री तीन कारवाया करण्यात आल्या. यावेळी 18 लाखांचा मुद्देमाल जप्त करीत पाच तस्करांना अटक करण्यात आली. दारूतस्करी होत असल्याच्या गुप्त माहितीनंतर पोलिस अधीक्षक अरविंद साळवे यांच्या मार्गदर्शनात स्थानिक गुन्हे शाखेचे पोलिस निरीक्षक बाळासाहेब खाडे यांच्या नेतृत्त्वात या कारवाया करण्यात आल्या.
शहरातील रामनगर चौकात नाकाबंदी करीत पहिली कारवाई करण्यात आली. यावेळी एमएच 34 एम 9935 क्रमांकाच्या चारचाकी वाहनाची तपासणी केली. यावेळी आरोपी शक्ती संजू शाह (वय 37, रा. वळण मार्ग चंद्रपूर), लक्ष्मीनारायण पुतान परसराम (वय 35, रा. अष्टभुजा वॉर्ड), रवींद्र विजय गुजर (वय 30, रा. अष्टभुजा वॉर्ड) हे तिघे वाहनात होते. वाहनातून विदेशी दारूचा साठा आढळून आला. पोलिसांनी वाहन आणि दारूसाठा असा सुमारे 10 लाख 3 हजार 600 रुपयांचा मुद्देमाल जप्त केला.
रेल्वेस्थानक चौकात दुसरी कारवाई करीत साजिद इसाक कुरेशी (वय 31, रा. शास्त्रीनगर, वणी) याला अटक केली. हा एमएच 29 एम 5967 क्रमांकाच्या ऑटोने दारूची तस्करी करीत होता. यावेळी दीड लाख रुपये किंमतीची देशी दारू, बिअर असा सुमारे दोन लाख चार हजार चारशे रुपयांचा मुद्देमाल जप्त केला. तसेच जनता कॉलेज चौकात तिसरी कारवाई करण्यात आली. यावेळी एमएच 34 बीबी 1472 क्रमांकाच्या चारचाकी वाहनातून दारूतस्करी केली जात होती. पोलिसांनी वाहनाची तपासणी करीत 1लाख रुपये किंमतीची देशी दारू आणि वाहन असा 6 लाख रुपये किंमतीचा मुद्देमाल जप्त केला. यावेळी चालक ईश्वर रमेश वाघमारे (वय 26, रा. हॉस्पिटल वॉर्ड, चंद्रपूर) याला अटक केली. स्थानिक गुन्हे शाखेच्या कारवाई अवैध दारूतस्करांचे चांगलेच धाबे दणाणले आहेत.
