विश्वभारत News Website
Related Articles
विश्व भारत ऑनलाईन :
‘नटसम्राट’ या प्रसिद्ध नाटकात ‘कुणी घर देता का घर’ हे वाक्य सर्वपरिचित आहे. अशाच प्रकारचे वाक्य जळगाव जिल्ह्यातील बोदवड तालुक्याला लागू पडतेय. या तालुक्याला तहसीलदार नाही. बोदवडच्या जनतेला”…तहसीलदार देता का तहसीलदार” नटसम्राटमधील वाक्याप्रमाणे बोलण्याची वेळ आली आहे.
बोदवड येथील तहसील कार्यालयात तहसीलदार मिळत नसल्याने राज्य शासनाचे लक्ष वेधण्यासाठी तालुक्यातील एकाने चक्क सरण रचून आमरण उपोषण सुरू केले आहे.ग्रामीण भागातील विविध समस्यांसाठी नागरीकांना तहसीलमध्ये कामासाठी यावे लागत असल्याने रीक्त पदावर तहसीलदारांची त्वरीत नियुक्ती करण्याची मागणी निवेदनाव्दारे रहिवासी प्रमोद धामोडे यांनी केली होती. पूर्णवेळ तहसीलदार नसल्यामुळे वृद्ध, अपंग व निराधार नागरीकांना तसेच पुरवठा शाखेमध्ये विविध कामांसाठी येणार्‍या ग्रामस्थांची प्रचंड गैरसोय होत होती. याबाबत बर्‍याच वेळा विविध पक्षामार्फत तसेच संघटनांमार्फत वारंवार निवेदने देण्यात आली. मात्र याबाबत वरीष्ठ पातळीवरून कोणत्याही प्रकारची दखल घेण्यात न आल्याने सोमवार, दि. 19 पासून बोदवड तहसील कार्यालयाबाहेर पूर्णवेळ तहसीलदारांची नियुक्ती होत नाही, तोपर्यंत सरणावर झोपून आमरण उपोषणास कायम ठेवणार असल्याचा इशारा धामोडे यांनी दिला आहे.
