विश्वभारत News Website
Related Articles
चंद्रपूर जिल्ह्यातील चिमूर वनपरिक्षेत्रात मंगळवारी झालेल्या दोन वाघाच्या झुंजीत एकाचा मृत्यू तर एक वाघ जखमी झाला. मात्र, या जखमी वाघाने जंगलाचा रस्ता धरल्याने त्याच्या शोधासाठी वनखात्याने तब्बल ६५ वनकर्मचारी आणि १५ ट्रॅप कॅमेरे लावले.
खडसंगी नियतक्षेत्रातील वहानगाव येथील सुभाष दोडके यांच्या शेतात ‘बजरंग’ आणि ‘छोटा मटका’ या दोन वाघांमध्ये शिकारीवरुन झुंज झाली. यात बलाढ्य ‘बजरंग’ मृत्यूमुखी पडला तर ‘छोटा मटका’ गंभीर जखमी झाला. या जखमी वाघाच्या शोधासाठी ताडोबा-अंधारी व्याघ्रप्रकल्पाचे क्षेत्रसंचालक व बफर क्षेत्राचे उपसंचालक यांच्या आदेशावरुन टीम गठीत करण्यात आली.
खडसंगी वनपरिक्षेत्र अधिकारी किरण धानकुटे यांच्यासोबत निमढेला येथील क्षेत्र सहाय्यक बी.आर. रंगारी, खडसंगी क्षेत्र सहाय्यक आर.जे. गेडाम, वनरक्षक जी.एम. हिंगणकर, निखील बोडे, संतोष लोखंडे, चेतन कोटेवार, विशेष व्याघ्र संरक्षण दलाचे कर्मचारी, प्राथमिक बचाव पथकाचे कर्मचारी, कुटी मजूर, रोजंदारी मजूर, अलिझंजा व निमढेला निसर्ग पर्यटन प्रवेशद्वारावरील पर्यटक मार्गदर्शक, जिप्सी चालक मालक असे एकूण ६५ वनकर्मचारी यांनी पायदळ गस्त केली. वाघाच्या मृत्यू ठिकाणापासून कक्ष क्र. ५७ व ५५ मध्ये एकूण १५ ट्रॅप कॅमेरे लावण्यात आले. या माध्यमातून जखमी झालेल्या वाघाचा शोध घेतला असता त्याच्या शरीरावर किरकोळ जखमा आढळून आल्या व वाघ सुदृढ अवस्थेत असल्याचे दिसून आले.
