भाजपचे नेहमी चर्चेत असलेले आमदार गोपीचंद पडळकर आणि सांगली जिल्हा परिषदेचे माजी सभापती ब्रह्मानंद पडळकर यांना मिरज तहसीलदार दगडू कुंभार यांनी चांगलाच दणका दिला आहे.
मिरजमधील वादग्रस्त जागेवर संबंधित मिळकतदारांचा हक्क देण्याचा आदेश तहसिलदारांनी मान्य केला आहे. तसेच ब्रम्हानंद पडळकर यांना या निकालाबाबत न्यायालयामध्ये दाद मागण्याचीही मुभा दिली आहे.
प्रकरण काय?
7 जानेवारीला मध्यरात्री मिरज शहरातील छत्रपती शिवाजी महाराज रोडवरील दुकाने, हॉटेल जेसीबीच्या साह्याने पाडले आणि बेकायदेशीरपणे या जागेचा ताबा घेण्याच्या प्रयत्न केला असा आरोप ब्रह्मानंद पडळकर यांच्यावर करण्यात आला आहे. या पाडकामात त्यांनी जवळपास 10 आस्थापनांचं नुकसान केलं होतं. या प्रकरणात ब्रम्हानंद पडळकर यांच्यासह 100 जणांवर गुन्हा दाखल करण्यात आला आहे.
त्यानंतर या प्रकरणात तहसिलदारांपुढेही सुनावणी सुरु होती. अखेर आज तहसिलदार दगडू कुंभार यांनी या प्रकरणात मिळकतदारांच्या बाजूने निकाल दिला आहे. या जागेवर संबंधित मिळकतदारांचाच कब्जा असल्याचा निकाल तहसिलदारांनी दिला आहे. तसेच ब्रम्हानंद पडळकर यांना या निकालाबाबत न्यायालयामध्ये दाद मागण्याची मुभा देण्यात आलेली आहे.