विश्वभारत News Website
Related Articles
शासकीय नर्सरीत कार्यालयीन वेळेत दारूची पार्टी करणे क्षेत्र सहायक व वनरक्षकाला चांगलेच महागात पडले आहे. दारूची पार्टी करणाऱ्या बेडगाव वनपरिक्षेत्रात कार्यरत क्षेत्रसहायक आणि वनरक्षकाला देसाईगंज उपवनसंरक्षक धर्मवीर सालविठ्ठल यांनी निलंबित केले. वनविभागात एकच खळबळ उडाली आहे. गडचिरोलीतील कोरची तालुक्याअंतर्गत बेडगाव वनपरिक्षेत्र कार्यालय येते.
कार्यालयात कार्यरत असलेले क्षेत्र सहायक अजय गहाणे आणि वनरक्षक बबलू वाघाडे यांनी वन विभागाच्या मोहगाव येथील नर्सरीत कार्यालयीन वेळेत दारूची पार्टी केली होती. दोघेही मद्यधुंद अवस्थेत कार्यरत होते. रोपवाटिकेत आलेल्या नागरिकांच्या हा प्रकार लक्षात आला. नागरिकांनी संबंधितांचे चित्रीकरण करून वरिष्ठ अधिकाऱ्यांना तक्रार केली होती.
दोषी अधिकाऱ्यांचे निलंबन
कर्तव्यावर कसूर करून दारूच्या नशेत राहणाऱ्या कर्मचाऱ्यांवर कठोर कार्यवाही करण्यात यावी, अशी मागणी वरिष्ठांना करण्यात आली होती. याप्रकरणी चौकशी केल्यानंतर उपवनसंरक्षक धर्मवीर सालविठ्ठल यांनी दोषी अधिकाऱ्यांना १२ जुलै रोजी निलंबित केले.
