नागपूर शहरातील नारा परिसरात मोठ्या प्रमाणात झाडांची कत्तल करण्यात आली आहे. एका बांधकाम व्यावसायिकाने (बिल्डर) इमारत बांधण्यासाठी एक हजार हून अधिक झाडे कापली आहेत. विशेष म्हणजे नागपूर महापालिकेला याची माहितीही नव्हती. एका पर्यावरणप्रेमीच्या तक्रारीनंतर ही गंभीर बाब समोर आली आहे. उपमुख्यमंत्री तथा गृहमंत्री देवेंद्र फडणवीस यांच्या शहरात ही घटना घडली आहे.
कोण आहे बिल्डर?
जेरी प्रॉफिट ग्रुप नावाच्या बिल्डर कंपनीची नारा स्मशानभूमीजवळ 5 एकर जमीन आहे. येथे इमारत बांधण्यासाठी बिल्डरकडून गेल्या दहा ते बारा दिवसांपासून झाडे कापण्यात येत आहेत. आतापर्यंत एक हजार हून अधिक झाडे कापण्यात आली आहेत. त्याचबरोबर आणखी अनेक झाडे कापण्यात येणार आहेत. नागपूरचे वृक्षमित्र सचिन खोब्रागडे यांच्या तक्रारीनंतर ही बाब उघडकीस आली. तपासाअंती संबंधितांवर पोलीस तक्रारही करण्यात येणार आहे.
हेरिटेज झाडेही कापली
हा प्रकार उघडकीस आल्यानंतर महानगर पालिकेच्या उद्यान विभागात एकच खळबळ उडाली आहे. तक्रार मिळाल्यानंतर उद्यान विभागाचे अधिकारी घटनास्थळी पोहोचले. या बेकायदेशीर तोडणीत 20हून अधिक हेरिटेज झाडेही कापली गेल्याची पुष्टी त्यांनी केली. त्यासोबतच यात बाभळीच्या झाडांची संख्या सर्वाधिक आहे.