ग्रेड पे निश्चितीसाठी तहसीलदार, नायब तहसीलदार अधिकाऱ्यांनी सोमवारपासून बेमुदत कामबंद आंदोलन सुरू केले आहे. नायब तहसीलदार राजपत्रित वर्ग -२ यांचे ग्रेड पेच्या मागणीसाठी संप पुकारला आहे. त्यामुळे पहिल्या दिवशी काही प्रमाणात महसुली कामांवर परिणाम झाल्याने दिसून आले. विविध जिल्ह्यातील अधिकारी या संपात सहभागी आहेत. तत्पूर्वी नागरिकांना संपादरम्यान कोणतीही समस्या निर्माण होऊ नये, म्हणून मंडळ अधिकाऱ्यांकडे कामाची जबाबदारी सोपवली आहे. सन १९९८ पासूनचा नायब तहसीलदार संवर्गातील अधिकाऱ्यांवरील अन्याय दूर करावा, त्यांना राजपत्रित अधिकाऱ्यांची वेतनश्रेणी लागू करावी, या मुख्य मागणीसाठी हे बेमुदत आंदोलन करण्यात येत आहे.
कारेमोरे यांचा आक्षेप
तर, काही तहसीलदार, नायब तहसीलदार विविध मार्गानी अपसंपदा जमवितात. रेती तस्करांसोबत संबंध ठेवतात. दर महिन्याला रेती तस्कर यांच्याकडून तहसीलदार, नायब तहसीलदार यांना मोठी रक्कम देण्यात येते. त्यामुळे नायब तहसीलदार, तहसीलदार यांना अधिक वेतनाची काय आवश्यकता,असा सवाल अखिल भारत हिंदू महासभेचे राष्ट्रीय प्रचारक मोहन कारेमोरे यांनी उपस्थित केला आहे.